Deklarata e analistit dhe ish-politikanit Dardan Gashi, i cili tha se “në një vend normal, ky zotëri (Kurti) nuk do të duhej t’i kishte mbi 15 për qind”, ka nxitur reagime dhe debat në opinionin publik.
Kritikët e kësaj deklarate vlerësojnë se një qëndrim i tillë nuk prek vetëm kryeministrin Albin Kurti, por edhe qindra mijëra qytetarë që vazhdojnë ta mbështesin me votë. Sipas tyre, nëse Kurti nuk meriton as 15 për qind të mbështetjes, atëherë vihet në pikëpyetje edhe gjykimi i votuesve që e kanë nxjerrë vazhdimisht fitues në zgjedhje.
Deklarata ka hapur diskutime të reja në rrjetet sociale, ku shumë qytetarë kanë kërkuar më shumë respekt për vullnetin e elektoratit, pavarësisht dallimeve politike. Të tjerë, ndërkaq, e kanë mbrojtur Gashin, duke argumentuar se ai ka shprehur një vlerësim politik dhe jo një qëndrim ndaj votuesve.
Debati vjen në një periudhë kur skena politike në Kosovë vazhdon të mbetet e polarizuar, ndërsa çdo deklaratë për mbështetjen elektorale të Kurtit dhe lëvizjes së tij vazhdon të prodhojë reagime të forta në publik.