Ngërçet muskulore janë spazma të papritura të muskujve që shkaktojnë dhimbje. Edhe pse zakonisht nuk janë të rrezikshme, ato krijojnë një ndjesi të pakëndshme për shkak të kontraktimit të fortë të muskujve.
Ngërçet mund të zgjasin nga disa sekonda deri në dhjetë minuta dhe mund të prekin muskujt e pulpës, muskujt e këmbëve ose të kofshëve (këto të fundit ndodhin më rrallë).
Arsyet pse shfaqen ngërçet mund të jenë të ndryshme.
Megjithatë, më të zakonshmet janë këto:
1. Dehidratimi
Ndonjëherë, ngërçet e këmbëve gjatë natës shkaktohen nga mungesa e hidratimit, pasi kjo gjendje çon në çekuilibër të elektroliteve.
2. Mungesa e mineraleve
Ngërçet muskulore mund të shfaqen edhe për shkak të mungesës së disa mineraleve të rëndësishme në trup, si magnezi, kaliumi dhe kalciumi.
3. Teprimi me ushtrime fizike
Edhe pse ushtrimet janë të mira për trupin, tejlodhja mund t’i mbingarkojë muskujt, duke shkaktuar ngërçe.
4. Stili i jetesës sedentare
Për të funksionuar siç duhet, muskujt kanë nevojë të shtrihen herë pas here, gjë që shpesh e harrojmë kur puna na kërkon të qëndrojmë ulur për shumë orë.
5. Qëndrimi i gabuar
Muskujt tensionohen lehtë kur kemi qëndrim të keq trupor dhe qëndrim të zgjatur ulur ose në këmbë.
6. Kompresimi i nervave
Nervat në këmbë mund të ngjeshen nga gjendje si shiatiku ose hernia diskale, gjë që mund të shkaktojë ngërçe.
7. Shtatzënia
Ndryshimet hormonale dhe shtimi i presionit mbi enët e gjakut mund të çojnë në ngërçe muskulore te gratë shtatzëna.
8. Medikamentet
Efektet anësore të disa barnave, si diuretikët, statinat ose antipsikotikët, mund të shkaktojnë ngërçe.
9. Konsumi i alkoolit
Alkooli ndikon te trupi duke shkaktuar dehidrim të muskujve dhe çekuilibër mineral.
10. Disa gjendje mjekësore
Gjendje të caktuara si diabeti, sëmundjet e veshkave, çrregullimet e tiroides dhe sëmundja e arterieve periferike mund të shkaktojnë ngërçe muskulore.
Sipas Healthline, disa trajtime të zakonshme që mund të ndihmojnë në parandalimin dhe lehtësimin e shqetësimit të menjëhershëm janë: masazhi i këmbëve, shtrirjet, ecja mbi thembra, aplikimi i nxehtësisë (si peshqir i ngrohtë, shishe me ujë të ngrohtë ose jastëk ngrohjeje në zonën e prekur), konsumimi i lëngut të turshive dhe marrja e barnave anti–inflamatore jo–steroidale (NSAID) si ibuprofeni dhe naprokseni.