Në emisionin Pressing, tri ushtare të Ushtrisë Çlirimtare të Kosovës – Shyhrete Kastrati, Velvetie Zogaj dhe Demrije Salihaj – po ndajnë përjetime të drejtpërdrejta nga lufta, nga humbjet dhe nga momentet që u kanë mbetur të ngulitura përjetë.
Demrije Salihaj ka sjellë një nga dëshmitë më të rënda të mbrëmjes, duke rrëfyer çfarë kishte ndodhur ditën e masakrës së Reçakut, më 15 janar 1999.
“Masakra e Reçakut na ka trondit të gjithëve. Kemi qenë shumë afër, në fshatin Petrovë. Vetëm një kodër na ndante prej Reçakut. Atë ditë unë kam qenë roje prej orës 6 të mëngjesit. U dëgjonin krismat. Ma bën një shok ‘ki kujdes, diçka po ndodh, nuk është si ditët e tjera’,” tregoi ajo.
Rreth gjysmë ore pasi kishte marrë rojën, patrulla i kishte dhënë lajmin: “Bone alarm, sepse është ka ndodh një luftë e hatashme në Reçak.” Njësiti i tyre ishte nisur menjëherë drejt fshatit.
“Pas nja 15 minutave ka ardhë ushtari i parë i plagosur, aty e kam pa çka po ndodh. Pas një ore kemi arrit në Reçak, por jo në brendi se s’kemi mujt. Mu më ka ra me tërhekë një kufomë, ushtar, shokun tonë – Shaqirin. Për mu ka qenë përjetim tepër i rëndë, sepse çdo gjysmë ore vinin ushtarë të vrarë,” dëshmoi Salihaj.