Pankreasi është një gjëndër e madhe, përgjegjëse për prodhimin e lëngjeve tretëse dhe hormoneve, e vendosur në pjesën e sipërme të barkut, menjëherë pas stomakut.
Kanceri i pankreasit është një formë kanceri që fillon në pankreas si rezultat i rritjes jonormale të qelizave në këtë gjëndër. Ai është kanceri i dhjetë më i përhapur në Mbretërinë e Bashkuar.
Fatkeqësisht, rrallë kapet në një fazë të hershme, pasi simptomat nuk shfaqen derisa sëmundja të ketë avancuar përtej pikës së ndërhyrjes së hershme.
Zakonisht, është vetëm kur kanceri arrin një fazë më të avancuar që disa simptoma fillojnë të bëhen të dukshme. Por edhe atëherë, ato mund të jenë të paqarta dhe të ngjashme me ato që shkaktohen nga shumë gjendje të tjera.
Simptomat ndryshojnë në varësi të pjesës së pankreasit — kokës, trupit ose bishtit — ku zhvillohet kanceri.
Lloji më i zakonshëm i kancerit të pankreasit është adenokarcinoma duktale, e cila fillon në qelizat që prodhojnë lëngjet tretëse.
Disa nga shenjat më të zakonshme, sipas Cancer Research UK, janë si më poshtë:
Dhimbje në stomak ose shpinë
Dhimbja kronike ose e pashpjegueshme në bark, e cila mund të përhapet në shpinë, mund të jetë një shenjë e kancerit të pankreasit. Kjo dhimbje ndihet veçanërisht pas ngrënies.
Në fazat e hershme, dhimbja mund të vijë dhe të shkojë, por ndërsa tumori rritet, ajo zakonisht bëhet më konstante dhe zgjat më gjatë.
Verdhëza (Jaundice)
Shumë persona të diagnostikuar me kancer të pankreasit zhvillojnë verdhëz—zverdhesim të lëkurës dhe syve si pasojë e grumbullimit të bilirubinës, një pigment që prodhohet nga mëlçia.
Kjo ndodh sepse tumori bllokon kanalin e tëmthit.
Humbje peshe
Humbja e një sasie të konsiderueshme peshe pa një arsye të dukshme është një nga shenjat e kancerit në përgjithësi, përfshirë edhe kancerin e pankreasit.
Probleme të tretjes
Tretje e dobët, jashtëqitje të lirshme ose jashtëqitje të yndyrshme dhe me erë të fortë mund të jenë rezultat i ndërhyrjes së kancerit në prodhimin e enzimave të pankreasit.
Ndryshime në jashtëqitje
Kur dhe nëse kanali pankreatik bllokohet, kjo mund të çojë në një simptomë të quajtur steatorea, ose jashtëqitje yndyrore. Kjo tregon se trupi nuk po thith ushqimin siç duhet. Ndryshime të tjera në jashtëqitje mund të përfshijnë diarre dhe kapsllëk.
Diabet i ri
Në disa raste, kanceri i pankreasit ndikon në prodhimin e insulinës, duke shkaktuar diabet tek personat që më parë nuk ishin diabetikë.
Si me shumicën e kancereve të tjera, lodhja dhe mungesa e energjisë mund të jenë simptoma që shoqërojnë kancerin e pankreasit.
Tromboza e gjakut
Rreziku i zhvillimit të mpiksjes së gjakut rritet kur një person diagnostikohet me kancer të pankreasit. Kjo njihet si trombozë e thellë venoze (DVT).
Ethe dhe dridhje
Nëse keni verdhëz ose pankreas të inflamuar, mund të përjetoni gjithashtu ethe të rastësishme të shoqëruara me dridhje.
Verdhëza, një nga simptomat e kancerit të pankreasit, mund të shkaktojë kruajtje të lëkurës për shkak të rritjes së kripërave të tëmthit në gjak.
Edhe pse shkaku i saktë që çon te kanceri i pankreasit nuk mund të përcaktohet me siguri, ekzistojnë disa faktorë rreziku.
Ata përfshijnë duhanin, mbipeshën, moshën dhe faktorët gjenetikë.
Shënim: Informacioni i dhënë në këtë artikull është vetëm informativ. Për këshilla të personalizuara, gjithmonë konsultohuni me mjekun tuaj.